“WAKATI Profesa Maghembe anateuliwa kuwa Waziri wa Maji, Mradi wa
Maji kutoka Ziwa Victoria kwenda miji ya Kahama na Shinyanga ulikuwa
unahudumia idadi ndogo sana ya wananchi wa mikoa ya Mwanza na Shinyanga
na ulikuwa unafanya kazi chini ya asilimia 15 ya uwezo wake, lakini
baada ya kuteuliwa katika wizara hiyo, huduma ya maji kupitia mradi huo
iliongezeka.
Waliobeza uteuzi wake katika Serikali ya Awamu ya Tano kuwa ni waziri
mzigo hawajui uwezo wa Profesa Maghembe.” Hiyo ni kauli ya Mkurugenzi
Mtendaji wa Mamlaka ya Majisafi na Usafi wa Mazingira Kahama– Shinyanga
(KASHWASA), Clement Kivegalo. Kivegalo alitoa kauli hiyo hivi karibuni
mjini Shinyanga alipokuwa akizungumzia Baraza la Mawaziri aliloliteua
Rais John Magufuli.
Kwanza mhandisi huyo anamshukuru Mwenyezi Mungu kwa kuipitisha nchi
hii katika uchaguzi salama na kupatikana chaguo la Watanzania ambalo ni
Dk Magufuli. Anasema katika nchi yoyote duniani, wananchi huwa na
matamanio ya kumpata kiongozi bora na atakayetekeleza kwa vitendo ahadi
za chama chake na anayesukumwa na maslahi mapana ya nchi yake.
“Hivi sasa ikiwa ni miezi michache tu tangu Rais John Magufuli ashike
hatamu za uongozi wa nchi yetu, wananchi walio wengi wanaonekana
kuridhishwa na kasi ya utendaji wake na hususani baraza aliloliunda,”
anasema. Anasema kwa mwenendo wa utendaji kazi wa Rais John Magufuli na
Serikali yake, bila shaka utawezesha kurejesha uzalendo wa mtu mmoja
mmoja hapa nchini, hali ambayo itaimarisha umoja, upendo na mshikamano
wa wananchi.
Uteuzi wa Profesa Maghembe Anasema Desemba 23 mwaka 2015 Rais John
Magufuli alikamilisha uteuzi wa Baraza la Mawaziri kwa kujaza wizara nne
zilizokuwa zimeachwa kiporo na moja ya wizara hiyo ni ya Mali Asili na
Utalii aliyopewa Profesa Jumanne Maghembe kuisimamia. Anasema, kama
ilivyo ada, baadhi ya wananchi kupitia vyombo mbalimbali vya habari na
mitandao ya kijamii walitoa maoni yao kuhusu uteuzi huo huku wengine
wakielekeza kidole kwa Profesa Maghembe, wakishangaa ni kwa nini Rais
alimteua kushika Wizara ya Mali Asili na Utalii ambayo ni moja ya wizara
nyeti.
“Sisi tunaomjua Maghembe tulibaki tu kuwashangaa waliohoji uteuzi
wake lakini tulifurahi na hata kama angelimrejesha kwenye wizara ya maji
tungefurahi pia,” anasema Kivegalo. Anasema Profesa Maghembe kama
ilivyo kwa binadamu wote, anaweza kuwa na mapungufu ya hapa na pale
lakini kwa ujumla, anasema ni moja wa mawaziri wazalendo na wachapakazi.
Uwezo wa Maghembe Anasema katika kipindi alichosimamia sekta ya maji
nchini, yeye binafsi ameshuhudia ongezeko la miradi ya maji katika
maeneo ya mbalimbali nchini ambayo yamewezesha pia ongezeko la idadi ya
wananchi wanaopata huduma ya uhakika ya maji safi na salama, mijini na
vijijini. Anasema ipo mifano mingi juu ya utendaji kazi mzuri wa Profesa
Maghembe, ikiwa ni pamoja na upanuzi wa Mradi wa Maji kutoka Ziwa
Victoria kwenda miji ya Kahama na Shinyanga.
Anasema kupanuliwa kwa mradi huo ni moja ya juhudi zilizofanywa na
Profesa Maghembe katika sekta ya maji, ambapo wakati anakabidhiwa
wizara, mradi huo ulikuwa unahudumia idadi ndogo ya watu, sawa na
asilimia 15 ya uwezo wake. “Ukiondoa miji ya Kahama na Shinyanga,
kulikuwa na vijiji 39 tu vya wilaya za Misungwi, Kwimba, Shinyanga na
Kahama vilivyokuwa vinapata huduma ya maji huku zaidi ya vijiji 40 vya
wilaya hizo vilivyopo pembezoni mwa bomba linalosafisha maji vikiwa
havina huduma ya maji,” anaeleza.
Anasema wakati Profesa Maghembe alipofanya ziara ya kutembelea mradi
huo wa maji mwaka juzi, alisikitishwa na hali ya wananchi wengi kukosa
huduma ya maji ikizingatiwa kuwa mradi ulijengwa kwa gharama ya Sh
bilioni 254, fedha za ndani zinazotokana na kodi za wananchi lakini
ulikuwa hauwanufaishi wananchi wengi. “Miezi michache baada ya ziara
hiyo, uliibuliwa mradi wa maji uliounganisha vijiji hivyo 40 na ndani ya
mwaka mmoja vijiji 16 viliunganishwa kwenye mtandao wa maji ya Ziwa
Victoria,” anasema.
Anasema mji wa Ngudu ulioko Kwimba mkoani Mwanza uliunganishwa pia
kwenye mtandao huo na kwamba Kuunganishwa kwa mji wa Ngudu na vijiji 16
kwenye mtandao huo, kuliwezesha wananchi zaidi ya 91,113 pamoja na
mifugo yao kupata huduma ya uhakika ya maji ya uhakika. Anasema, katika
mkoa wa Shinyanga, Profesa Maghembe ameondoka Wizara ya Maji akiwa
ameacha mradi wa kuunganisha vijiji vingine 24 ukiendelea pamoja na
mradi mwingine wa kuunganisha Mji wa Kishapu.
“Halikadhalika, miezi michache ijayo, utaanza mradi wa kusafirisha
maji kutoka Ziwa Victoria kwenda Manispaa ya Tabora na miji midogo ya
Igunga, Nzega, Kagongwa, Isaka na Tinde. “Kuibuliwa kwa mradi huu
mkubwa, ambao utagharimu zaidi ya Sh bilioni 200, kumetokana na dhamira
ya Maghembe na Serikali katika kuhakikisha inawaondolea wananchi kero ya
maji,” anasema.
Anasema bila shaka, mwananchi aliyeguswa na mafanikio hayo anaposikia
Profesa Maghembe akiitwa waziri mzigo ataishia kushangaa tu. “Nimesema
haya kuhusu utendaji kazi wa Profesa Maghembe kwa eneo dogo tu
ikilinganishwa na maeneo mengi ambayo kazi kubwa imefanyika chini ya
uongozi wake,” anasema.
Anasema ndio maana yeye na wengine waliofanya kazi kwa karibu na
Magh1 embe hawakushangaa waliposikia katika tathmini iliyofanywa na
Ofisi ya Rais Kitengo kinachosimamia Mpango wa Matokeo Makubwa Sasa
(BRN), sekta ya maji ikatajwa kuongoza.
Anasema pamoja na mafanikio hayo makubwa, bado ipo changamoto kubwa
ya kuwapatia wananchi wengi zaidi huduma ya maji. Anakiri kwamba baadhi
ya wananchi walikuwa hawaridhishwi na kasi ya serikali iliyopita katika
kutatua changamoto ya upatikanaji wa maji, lakini hali hiyo haitokani na
udhaifu wa Profesa Maghembe bali ufinyu wa bajeti.
Anasema sifa nyingine ya utendaji aliyoiona kwa Profesa Maghembe
ambayo kwa kiasi kikubwa inaendana na mtazamo wa Serikali ya Awamu ya
Tano, ni msisitizo wake juu ya matumizi ya watalaamu wa ndani katika
ujenzi wa miradi ili kupunguza gharama.
Anasema msisitizo huo ndio uliowezesha mradi wa kufikisha maji katika
mji wa Ngudu kujengwa ndani ya miezi mitatu ambao, pamoja na mambo
mengine, ulijumuisha ulazaji wa bomba lenye urefu wa kilometa 50 na
ujenzi wa miundombinu mbalimbali kwa gharama ya takribani Sh bilioni 2.4
tu.
Anasema hatua hiyo iliokoa zaidi ya Sh bilioni 8 ambazo zingetumika
endapo mradi ungepembuliwa, ukasanifiwa na kujengwa kwa kutumia kampuni
binafsi ya nje. “Halikadhalika fedha ambayo ingetumika kuunganisha
vijiji saba kwenye mtandao wa maji wa Ziwa Victoria endapo makampuni
binafsi yangetumiwa, ndiyo iliyotosha kuunganisha vijiji 16 kupata
huduma ya maji kwa kuwatumia wataalamu wa ndani,” anasema
Chanzo: HabariLeo