BALOZI AJERUHIWA KWA KISU

Baada ya kutekeleza shambulio hilo mhusika alijaribu kutoroka ila maafisa wa polisi walifanikiwa kumkamata.

Balozi wa Marekani nchini Korea Kusini, Mark Lippert ameshambuliwa na kujeruhiwa kwa kisu usoni na mkononi na mwanaume mmoja katika jiji la Seoul huko Korea ya Kusini.

Shambulio hilo lilitokea wakati balozi huyo alipokuwa akielekea kwenye semina jana asubuhi katika mji wa Seoul.

Mwanaume mmoja aliyesikika akipiga kelele zilizosema Korea Kaskazini na Korea Kusini zinatakiwa kuungana na vita havitakiwi Korea alimvamia Lippert ambapo alimjeruhi vibaya kwa kisu usoni na mkononi.

Baada ya kutekeleza shambulio hilo mhusika alijaribu kutoroka ila maafisa wa polisi walifanikiwa kumkamata.

Mtuhumiwa huyo ametambuliwa na maofisa hao kuwa ni Kim Ki-jong mwenye miaka 55.

Maafisa wa ngazi ya juu wa upelelezi wa Korea Kusini wamesema kuwa Kim alikuwa na safari za kwenda Korea Kaskazini mara 6 mfululizo kati ya mwaka 2006 na 2007.

Kwa mujibu wa shirika la habari la Daily Mail, madaktari wanaomhudumia Lippert wamesema kuwa mpaka sasa amepatiwa matibabu katika sehemu za uso na mikono zilizokuwa zimejeruhiwa vibaya kwa kisu ambapo usoni ameshonwa nyuzi 80.

Waziri Mkuu wa Korea Kusini, Lee Wan - Koo amesema kwamba amesikitishwa sana kwa kutokea kwa tukio hilo.

Polisi wamesema kuwa Kim ni mmoja kati ya wanachama wa chama cha Korea kinachotaka muungano baina ya nchi hizo mbili ambao ndio waliokuwa wameenda kufungua kinywa katika semina ambayo balozi Lippret alihudhuria jana asubuhi.

Polisi hao wamesema kuwa kisu ambacho Kim alitumia kumshambulia nacho Lippert kilikuwa na urefu wa inchi 10.

Madaktari wanaomtibu Lippert wamesema kuwa Lippert ataendelea kubaki hospitalini kwa siku tatu au nne zaidi ili kuuguza majeraha hayo.

Hata hivyo polisi wamesema kuwa hili si shambulizi la kwanza kufanywa na Kim dhidi ya maafisa wa kigeni nchini humo.

Mwaka 2010 Kim alifungwa jela miaka 3 kwa kufanya fujo katika ubalozi wa Japan nchini humo ambapo alikuwa akipinga madai ya Japan kuhusu umiliki wa kisiwa cha Dokdo ambacho Serikali ya Korea na Japan wanamzozo wa juu ya umiliki wa kisiwa hicho.

Shambulio hili limeibua maswali kadhaa huku wengi wakijiuliza kuwa je, Kim anafanya kazi mwenyewe au anashirikiana na makundi mengine ya ugaidi ya huko Korea ya Kaskazini.

   MATUKIO YA KUSISIMUA ZAIDI BOFYA HAPA>>