Serikali inatarajia kutoa ajira 40,000 kwa walimu wa shule za msingi na sekondari mwaka huu.
Naibu Waziri wa Nchi, Ofisi ya Rais, Tawala za Mikoa na Serikali za
Mitaa (Tamisemi), Suleiman Jaffo, alilieleza Nipashe jana kuwa idadi
hiyo inalenga kupunguza upungufu wa walimu shuleni.
Jaffo alisema ajira hizo zitatangazwa mapema mwaka huu na
zitaongeza nguvu kwenye shule zenye uhitaji wa walimu hasa mpya na zile
zilizoandikisha wanafunzi wengi wa darasa la kwanza na kidato cha
kwanza.
Sambamba na hilo, ameahidi kushirikiana na Halmashauri ya Manispaa
ya Temeke kuwezesha wanafunzi zaidi ya 5,800 wa Shule ya Msingi
Majimatitu wanapata elimu bora.
Alisema idadi hiyo ya wananfunzi ni sawa na idadi ya shule sita za
msingi, hivyo itagawanywa katika shule za jirani pamoja na kujenga
madarasa mapya katika shule hiyo.
“Ongezeko hili la wanafunzi waliojiandikisha darasa la kwanza mwaka
huu limetokana na mfumo wa serikali kutoa elimu bure na lengo la
serikali ni kutoa elimu bora, hivyo kama serikali tutahakikisha
tunaboresha mazingira kwa kuweka madawati ya kutosha, madarasa na
walimu, hivyo hakuna mwanafunzi atakayekaa chini kuanzia mwezi wa sita,”
alisema Jaffo.
Pia alisema serikali itahakikisha inaongeza majengo katika shule
hiyo pamoja na kujenga shule mpya umbali wa kilomita moja kutoka shule
hiyo ilipo, katika kiwanja kilichotolewa na Katibu Mkuu Kiongozi
mstaafu, Balozi Martin Lumbanga, kwa ajili ya kujenga shule mpya.
Alimtaka Mkurugenzi wa manispaa hiyo, Photidas Kagimbo, kuangalia
uwezekano wa kujenga jengo la ghorofa katika kiwanja hicho ili kukidhi
mfumuko wa wanafunzi wanaoandikishwa kila mwaka pamoja na kupunguzia
wanafunzi wa Shule ya Mbagala Majimatitu katika shule hiyo mpya.
Pia aliwataka kuwashirikisha wamiliki wa viwanda wa manispaa hiyo,
mchakato wa ujenzi wa madarasa ili kukamilisha kazi hiyo kwa wakati.
Jafo pia alimtaka Ofisa Elimu wa wilaya hiyo, Angel Frank,
kuhakikisha walimu wa shule hiyo wanaotakiwa kupandishwa daraja
wanafanyiwa hivyo pamoja na kulipwa mishahara stahiki kwa wakati
kutokana na kazi kubwa wanayoifanya ya kulea watoto hao.
Naye Mkuu wa shule hiyo, Abdallah Ngomi, alisema shule ina zaidi
ya wanafunzi 5,800, walimu 77 wakati mahitaji yakiwa ni walimu 131 na
madawati 900 hali inayowalazimu kuweka madawati 52 katika darasa moja
badala ya 15 huku mahitaji ya kwa shule nzima yakiwa ni 1,959.
“Tuna uhitaji wa vyumba vya madarasa 131 na kwa sasa tunavyo 22
pekee na tunatarajia kujenga 10, hivyo mahitaji ni 109, matundu ya vyoo
pia tunahitaji 203 wakati tunayo 36 tu.
"Kutokana na idadi hiyo kubwa, wanafunzi wanalazimika kusomea nje na wengine kuingia kwa awamu,” alisema.
Mwaka huu shule hiyo imeandikisha wanafunzi 1,022 wa darasa la kwanza idadi ambayo ni sawa na wanafunzi wa shule moja.
Chanzo:Nipashe