LOWASSA
Akiwa Babati Vijijini jana, Lowassa aliwaahidi wananchi wa jimbo
hilo kuwatatulia migogoro ya ardhi kati ya wakulima na wafugaji iwapo
atachaguliwa Rais wa Tanzania kupitia uchaguzi mkuu Oktoba 25, mwaka huu.
Aidha, aliwaahidi wakulima kuwatafutia soko la mchele ili wawe
huru kuuza mazao yao sehemu yoyote ndani na nje ya nchi.
Alisema hayo mjini Magugu alipokuwa akizungumza na wananchi na
kuaihidi kuwa akichaguliwa kuwa Rais ataunda tume ya maridhiano kwa ajili ya
kutatua migogoro ya wakulima na wafugaji.
"Migogoro ya ardhi inaniudhi sana na inanichosha sana
lazima nitaitafutia ufumbuzi," alisema.
Alisema tume hiyo itakuwa kwa ajili ya kuangalia ni nani atakua
amejipatia ardhi kwa dhuluma ili anyang'anywe.
Kuhusu wakulima wanaouza mchele, alisema atawatafutia soko kwa
ajili ya zao lao hilo na kwamba ataanzisha kodi ambazo zitakuwa rafiki kwa
wafanyabiashara ili waweze kuzimudu.
Akizungumzia elimu, Lowassa alisema kipaumbele chake cha kwanza
ni elimu kwa sababu dunia imebadilika na hali ya elimu ya Tanzania ni duni.
"Hali ya elimu yetu ni duni sana, darasa la saba ni tabu,
kidato cha nne ni tabu hadi chuo kikuu ni tabu na hadi wamelazimika kuweka
alama za kutunga," alisema.
Alisema katika serikali yake wanafunzi watasoma bure kuanzia
darasa la kwanza hadi chuo kikuu.
“Hili litawezekana kwa kuuza magari ya kifahari ya
serikali aina ya shangingi na mapato ya gesi asilia,” alisema.
“Watu wananiuliza kuwa elimu itakuwaje bure wakati hakuna
fedha?, yaani magari aina ya shangingi yote haya ya serikali yamejaa na gesi
asilia kwa nini wanafunzi washindwe kusoma bure?...ni lazima tuwekeze kwenye
elimu,” alisema.
SUMAYE
Kwa upande wake, aliyekuwa Waziri Mkuu Mstaafu, Frederick
Sumaye, ambaye ni kiongozi wa kampeni za mgombea huyo urais wa Ukawa aliwataka
wananchi kuwahi katika vituo vya kupigia kura asubuhi na mapema Oktoba 25,
mwaka huu, kwa kile alichodai kuna mchezo 'mchafu' umeandaliwa kwa
watakaochelewa kupiga kura.
“Ujanja unaweza kufanyika kwa wale watakaochelewa kufika
vituoni wasiweze kupiga kura. Oktoba 25, mwaka huu kuna kazi ya kupiga kura kwa
sababu tunaweza tukapiga kelele juu ya mabadiliko lakini kama hatutaenda kupiga
kura itakuwa ni kazi bure," alisema.
Aidha, aliwataka wananchi kuwa makini wanapopiga kura ili
wasiharibu kura zao.
Alisema katika karatasi za kupigia kura hakuna chama kinachoitwa
Ukawa, hivyo wanatakiwa kuwa makini na wasome kabla ya kupiga kura.
"Kwenye zile karatasi za kupigia kura kuna chama kinaitwa
Chadema, NLD, CUF na NCCR Mageuzi, hivyo unatakiwa kuweka tiki kwenye chama
kimoja wapo ambacho kinaunda Ukawa," alisema na kuongeza:
"Utakapokuwa unaweka tiki, hakikisha hugusi kwenye boksi la
mtu mwingine kwa sababu kwa kufanya hivyo utaharibu kura."
MAGUFULI
Naye mgombea urais wa CCM, Dk. Magufuli, akizungumza katika
mkutano wa kampeni Babati Mjini jana, alisema Watanzania maskini wananyanyasika
kwa kutozwa michango na ushuru wa aina mbalimbali, hivyo akiingia Ikulu atafuta
michango hiyo ili nao waishi maisha bora kama walivyo wengine.
Aidha, alisema ataunda serikali itakayokuwa inatoa huduma za
papo kwa papo kwa wananchi bila ya urasmu na kwamba hatavumilia utaratibu wa
ovyo wa njoo kesho na michakato isiyo na mwisho.
“Imekuwa kawaida kuona Watanzania wa chini wakikandamizwa kwa
kutozwa ushuru usio wa lazima ambao mwingi unaishia kwenye matumbo ya
watu wachache. Naomba urais ili nikawatumikie Watanzania wanyonge ambao kwa
muda mrefu wamekuwa wakinyanyasika ndani ya nchi yao kwa kukosa huduma
mbalimbali ambazo hudaiwa fedha,” alisema.
Mgombea urais huyo wa CCM, alisema imekuwa kawaida kwa mwananchi
wa kawaida kuombwa rushwa anapokwenda kutaka huduma mbalimbali, hivyo anaomba
urais ili akomeshe vitendo vya aina hiyo.
“Nipeni urais muone nitakavyofunga mianya ya rushwa na ushuru
usio na maana, mwananchi akiwa na nyanya zake ushuru, akienda kuuza vitumbua
vyake ushuru, akiwa na kambuzi kake anapeleka mnadani ushuru, mimi John
Magufuli nataka kwenda kufuta viushuru ushuru kama hivyo,” alisema na kuongeza:
“Nitawatumikia Watanzania wote bila kujali vyama vya siasa,
hivyo nawaomba watu wa vyama vyote mniunge mkono kwa kunipa kura nyingi
zaidi ya aslimia 99 niwe Rais kwani nina nia ya dhati ya kuleta Tanzania mpya.”
“Naomba mniamini niko kwa ajili yenu na kwa ajili ya maendeleo
ya Tanzania, nitawatumikia wote bila kujali tofauti zenu, nipeni urais
muone nitakavyopambana na ufisadi na wezi wa fedha za umma.”
WALIOJENGA BARABARANI KUBOMOLEWA
Awali akiwa wilaya mpya ya Chemba, mkoani Dodoma, Dk. Magufuli
alisema ingawa anaomba kura kuwania urais lakini watu waliojenga ndani ya
hifadhi ya barabara watabomolewa bila kulipwa fidia kwasababu wamekiuka sheria
za nchi ambazo ataapa kuzilinda akichaguliwa kuwa Rais.
Alisema hayo baada ya kuona mabango ya wananchi waliokuwa
wanadai fidia. Wananchi hao ni waliobomolewa kupisha barabara ya kutoka Kondoa
kwenda Dodoma ambao nyumba zao zilikuwa ndani ya hifadhi ya barabara.
“Ingawa anaomba kura lakini siwezi kuwadanganya wananchi
waliojenga ndani ya hifadhi ya barabara kwamba watalipwa fidia. Kura nazihitaji
sana lakini wale waliojenga ndani ya hifadhi ya barabara hawatalipwa fidia
kwani ni kinyume cha sheria, maana fedha hizo bora zitumike kujenga barabara
nyingine maeneo mbalimbali kuliko kulipa wavamizi wa barabara,” alisema.
Hata hivyo, aliwahakikishia waliojenga nje ya hifadhi ya
barabara kwamba wasiwe na wasiwasi kwani serikali yake itawalipa fidia kwani
barabara ndiyo imefuata makazi yao.
Alisema halmashauri zinapochukua ardhi ya wananchi kwa ajili ya
matumizi mbalimbali zinapaswa kuwalipa fidia tena watakayokubaliana nayo.
Alisema sheria inazitaka halmashauri pia kuwalipa wananchi
mazao mbalimbali wanayoyakuta kwenye maeneo wanayotaka kuyatwaa kwa kazi za serikali.
Chanzo: Nipashe